پاک آرمی نے برطانیہ میں منعقدہ پیٹرول مشق میں گولڈ میڈل حاصل کرلیا

لندن :پاک آرمی نے برطانیہ میں منعقدہ پیٹرول مشق میں گولڈ میڈل حاصل کرلیا۔ پاک فوج نے سب سے زیادہ 864پوائنٹس اپنے نام کرلیے،36 ممالک کی نمائندگی کرنے والی 118 ٹیموں کو شکست ہوئی ۔

تفصیلات کے مطابق پاک فوج کی کیمبرین ٹیم نے ویلز کے علاقے بریکن بیکنز ماؤنٹینز میں 4 تا13 اکتوبر منعقد ہ کیمبرین پٹرول 24میں گولڈ میڈل حاصل کرلیا۔پاک فوج نے ایکس سی پی 24میں سب سے زیادہ 864 پوائنٹس حاصل کیے اور دنیا بھر سے 36 ممالک کی نمائندگی کرنے والی 118 ٹیموں کو شکست دی۔

پاک فوج کی 67 پنجاب رجمنٹ نے مقابلے میں اب تک کے سب سے زیادہ 864 پوائنٹس حاصل کرکے طلائی تمغہ جیتا۔ 67 پنجاب رجمنٹ نے مسلسل دوسرے سال ایونٹ میں حصہ لیا اور کامیابی حاصل کی۔ پنجاب رجمنٹ کا قیام 23 جولائی 1972ء کو عمل میں آیا۔ یہ اکائی فخر صحرائی کے نام سے مشہور ہے، اس نے خیبر اور اورکزئی ایجنسی میں دہشت گردوں کے خاتمے میں زبردست کامیابیاں حاصل کر چکی ہے۔

پاکستانی ٹیم کو ٹریننگ میجر ثاقب علی ملک، ٹیم منیجر میجر عثمان اقبال، پٹرول کمانڈر کیپٹن راجہ حسن رضا اور ریزرو پٹرول کمانڈر کیپٹن حمزہ طاہر شاہ نے تربیت دی۔یہ مشق 60 سال سے زائد عرصے سے سالانہ بنیادوں پر ہوتی ہیں اور یہ برطانوی فوج کی پرنسپل آل آرمز پٹرول مشق ہے اور یہ تینوں سروسز (ریگولر اور ریزرو) اور بین الاقوامی شرکا کے لئے ہوتی ہیں۔

آرمی اینڈ ایئر ایڈوائزر برطانیہ کرنل تیمور راحت نے کہا کہ کیمبرین پٹرول بنیادی فوجی مہارتوں کا دنیا کا سب سے مشکل امتحان ہے۔ انہوں نے پاکستان کی جیت پر تبصرہ کرتے ہوئے کہا کہ ایونٹ کے دوران شرکا کی کارکردگی کا جائزہ بیٹل کرافٹ، انفرادی تربیت، مضبوطی اور قیادت جیسے عوامل کی بنیاد پر لیا جاتا ہے۔

انہوں نے کہا کہ کیمبرین پٹرول ایک سالانہ بین الاقوامی فوجی مشق ہے جس میں حصہ لینے والے یونٹ48 گھنٹوں سے بھی کم وقت میں 40 میل (65 کلومیٹر) کا کورس طے کرتے ہیں جبکہ کیمبرین پہاڑوں اور وسط ویلز (بریکن بیکنز نیشنل فاریسٹ) کی دلدل زمینوں میں متعدد قسم کے فوجی مینوورز اور گشت کرتے ہیں۔