لوٹن :پیپلز پارٹی سائوتھ زون کے زیر اہتمام شہید محترمہ بے نظیر بھٹو کی 17ویں برسی عقیدیت و احترام کے ساتھ منائی گئی

شہید رانی کی ساری زندگی پاکستان میں جمہوریت کے استحکام ، معاشی، دفاعی ترقی اور انسانی حقوق کیلئے تھی،مقررین

لوٹن میں پیپلز پارٹی سائوتھ زون کے زیر اہتمام عالم اسلام کی پہلی مسلم خاتون وزیر اعظم شہیدمحترمہ بے نظیر بھٹو کی 17ویں برسی عقیدیت و احترام کے ساتھ منائی گئی، تقریب لوٹن کے مقامی ریسٹورنٹ میں منعقد کی گئی جس کی میزبانی پیپلز پارٹی سائوتھ زون یوکے کے جنرل سیکرٹری ملک مہربان خان نے کی ۔

تقریب میں پیپلز پارٹی یوکے کے صدر محسن باری ،پیپلز پارٹی یورپ کے صدر ابرار میر ، یوتھ کے صدر آصف علی خان ،جنرل سیکرٹری اظہر بڑالوی، چوہدری نثار مقبول، چوہدری عارف ، مسعود رانا، قیصر داؤد ، فیاض قریشی و دیگر کارکنان سمیت مختلف سیاسی مکاتب فکر کے زعما جس میں شبیر ملک ، ممتاز بٹ، امتیاز چوہدری ، راجہ یعقوب ، آزاد ملک ، چوہدری شریف ، چوہدری امین پوٹھی، یاسر مسعود ، عبداللہ خان ، کونسلر اسلم خان ، کونسلر انوار ملک ، سابق مئیر و کالم نگار ریاض بٹ ،سابق میئر طاہر محمود ملک سمیت کثیر تعداد میں کمیونٹی نے شرکت کی۔

تقریب میں مقررین نے محترمہ بے نظیر بھٹو شہید کو زبر دست خراج عقیدت پیش کرتے ہوئے کہا کہ شہید رانی کی ساری زندگی کی سیاسی جدوجہد پاکستان میں جمہوریت کے استحکام ، معاشی، دفاعی ترقی اور انسانی حقوق کے لیے تھی اور اس کے لیے انہوں نے ہر قسم کے ظلم و جبر کا دلیرانہ مقابلہ کیا بلکہ عوام کے اندر ہی اپنی جان کا نذرانہ پیش کر کے یہ ثابت کیا کہ جمہوریت کی آبیاری کے لیے وہ عوامی طاقت پر گہرا یقین رکھتی تھیں۔

اس موقع پر تمام شرکاء کا مشترکہ طور پر اس بات پر اتفاق تھا کہ پاکستان کو اس وقت سخت بیرونی اور اندورنی چیلنجز کا سامنا ہے اور اس کے لیے تمام سیاسی پارٹیوں میں اتحاد کی اشد ضرورت ہے اور محترمہ بی بی شہید کا جمہوریت کے استحکام کے لیے مفاہمت اور باہمی اتحاد کی پالیسی والا بیانیہ ہی پاکستان کوتمام قسم کے بحرانوں سے نکال سکتا ہے ۔

پروگرام کے اختتام پر قائد عوام شہید ذوالفقار علی بھٹو اور شہید محترمہ بے نظیر بھٹو اور خاندان کے ایصال ثواب اور درجات بلند کرنے کے لیے دعا کی گئی۔