آئین و قانون کی حکمرانی بحال کرنے پر سپریم کورٹ کے ججز کو سراہتا ہوں، عمران خان

اسلام آباد:عمران خان نے وزیراعلیٰ پنجاب کے انتخاب سے متعلق عدالتی فیصلے کو تاریخی قرار دیتے ہوئے کہا کہ پنجاب میں اب عوامی حکومت قائم ہوگئی۔

سابق وزیر اعظم و چیئرمین پاکستان تحریک انصاف عمران خان نے وزیراعلیٰ پنجاب سے متعلق ڈپٹی اسپیکر کی رولنگ کے خلاف دئیے گئے سپریم کورٹ کے فیصلے کو تاریخی قرار دیا ہے۔

عمران خان نے اپنے ٹوئٹ میں سپریم کورٹ کے ججز کو ہر طرح کی دھمکیوں اور بدسلوکی کے سامنے ڈٹے رہنے اور آئین و قانون کی حکمرانی بحال کرنے پر سراہا۔

انہوں نے عدالت عظمیٰ میں دلائل دینے اور ڈپٹی اسپیکر کی رولنگ کیخلاف دائر کیس میں فتح حاصل کرنے پر تحریک انصاف کے وکیل بیرسٹر علی ظفر اور ان کی ٹیم کا شکریہ ادا کیا۔ عمران خان نے دھاندلی کے خلاف ضمنی انتخابات میں بڑی تعداد میں نکلنے پر پنجاب کی عوام کا بھی شکریہ ادا کیا۔

سابق وزیراعظم نے کہا کہ عدالتی فیصلے سے عوامی مینڈیٹ کو کامیابی ملی، اب پنجاب میں عوامی حکومت قائم ہوگئی ہے۔ عمران خان نے کل یوم تشکر منانے کا اعلان کرتے ہوئے کہا کہ حقیقی آزادی کےلیے کھڑے رہنے والے عوام کے ہمراہ کل جشن منائیں گے اور اللہ تعالیٰ کا خاص شکر ادا کریں گے۔