لندن:فرانس سے ایک ہی روز ریکارڈ696غیرقانونی تارکین وطن برطانیہ پہنچ گئے۔ان میں بچے بھی شامل ہیں۔انھوں نے 14چھوٹی کشتیوں کے ذریعے انگلش چینل عبورکیا،روا ں برس پرخطربحری راستے سےآنے والوں کی تعداد17ہزار سے بڑھ گئی۔
واضح رہے کہ یورپی عدالت کی مداخلت سے غیرقانونی تارکین وطن کو روانڈا بھیجنے کاحکومتی منصوبہ موخرکردیا گیا ہے تاہم وزارت عظمیٰ کے دونوں امیدوار لزٹرس اور رشی سوناک اس منصوبے کے حامی ہیں۔ تفصیلات کے مطابق فرانس سے سمندر کے راستے چھوٹی کشتیوں کے ذریعے تقریبا700 افراد برطانیہ پہنچے جو کہ رواں برس ایک ہی دن میں برطانیہ آنے والے پناہ گزینوں کی سب سے بڑی تعداد ہے، وزارت دفاع کے مطابق پیر کے روز 14کشتیوں میں سوار 696 افراد برطانیہ آئے جن میں بچے بھی شامل تھے۔
ان پناہ گزینوں کی آمد کے بعد رواں برس فرانس سے سمندر کے خطرناک راستے برطانیہ آنے والوں کی تعداد17ہزار سے تجاوز کرگئی ہے۔ گزشتہ ماہ 90کشتیوں کے ذریعے 3ہزار683 مہاجرین برطانیہ آئے جبکہ رواں برس ایک ماہ میں آنے والے مہاجرین کی سب سے بڑی تعداد بھی تھی، برطانیہ میں نئے قوانین کے تحت غیر قانونی طورپر ملک میں داخل ہونے والوں کو 4 برس تک کی سزا اور کشتیوں میں ہونے والے افراد کی عمر قید کی سزا بھی دی جاسکتی ہے۔
حکومت نے تین ماہ قبل غیر قانونی طورپر آنے والوں کو روانڈا بھیجنے کا اعلان بھی کیا تھا تاکہ سمندر کے راستے جان خطرے میں ڈال کر برطانیہ آنے والوں کی حوصلہ شکنی ہے، تاہم روانڈا جانے والی پرواز یورپین کورٹ آف ہیومن رائٹس کی مداخلت کے سبب آخری لمحات میں منسوخ کرنا پڑی تھی، تاہم ہوم سیکرٹری پریسٹی پیٹل اس منصوبے پر عمل پیرا ہونے کےلئے تیار ہیں، جبکہ کنزرویٹیو پارٹی کی قیادت کے دونوں امیدواروں لز ٹرس اور رشی سونک نے بھی منصوبے کو جاری رکھنے کا وعدہ کیا ہے۔
اپوزیشن جماعتوں کے علاوہ چیرٹی ادارے اور پرنس چارلس بھی اس منصوبے کو ’’غیر انسانی‘‘ قرار دے چکے ہیں۔ فرانس سے آنے والوں کو روکنے کے لیے حکومت، فرانسیسی حکومت کے ساتھ کئی ملین پونڈ کی ڈیل بھی کرنا چاہتی ہے تاکہ فرانس کے ساحلوں پر گشت بڑھایا جائے۔ حکومت اس سے قبل بھی فرانس کو اس ضمن میں کئی ملین پونڈ ادا کرچکی ہے۔
Comments are closed.