لندن:برطانیہ میں پاکستان کے ہائی کمشنر معظم احمد خان نے جمعرات کو بکنگھم پیلس میں منعقدہ ایک باضابطہ تقریب میں شاہ چارلس سوم کو اپنی سفارتی اسناد پیش کیں۔ ہائی کمشنر اور ان کی اہلیہ لینا سلیم معظم پاکستانی ہائی کمیشن لندن سے وائس مارشل آف ڈپلومیٹک کور کی معیت میں سرکاری بگھی میں بکنگھم پیلس گئے۔
بکنگھم پیلس میں ہائی کمشنر نے شاہ چارلس کو اپنی سفارتی اسناد پیش کیں۔ہائی کمشنر نے صدر اور وزیراعظم کی جانب سے کنگ چارلس کو مبارکباد اور نیک خواہشات کا پیغام پہنچایا۔ معظم احمد خان نے کہا کہ پاکستان کے عوام شاہ چارلس سوم کا بے حد احترام کرتے ہیں۔
ہائی کمشنر نے دونوں ممالک کے درمیان تعلقات کو مزید مضبوط بنانے کے لئے کام جاری رکھنے کے عزم کا اظہار کیا۔ شاہ چارلس سوم نے ہائی کمشنر اور ان کی اہلیہ کا بکنگھم پیلس میں استقبال کیا۔
پاکستان کی قیادت کے لئے نیک خواہشات کا اظہار کرتے ہوئے انہوں نے حالیہ سیلاب کے نتیجے میں ہونے والے جانی نقصان پر دکھ کا اظہار کیا اور اس مشکل وقت میں پاکستانی عوام کے ساتھ یکجہتی کا اعادہ کیا۔ پاکستان کے ہائی کمشنر معظم احمد خان کو یہ اعزاز حاصل ہے کہ وہ پہلے ہائی کمشنر ہیں، جنہوں نے بادشاہ کو اپنی اسناد پیش کیں۔
Comments are closed.