لندن: خواتین کے عالمی دن کے موقع پر مسلم لائرز ایسوسی ایشن اورلیڈز مسلم یوتھ فورم کے زیراہتمام ایک آن لائن کانفرنس کا انعقاد کیا گیا جس میں مہمان خصوصی برطانوی ہائوس آف لارڈز کی رکن بیرونس سعیدہ وارثی تھیں دیگر مقررین میں ملکہ برطانیہ کی ویسٹ یارکشائر میں نمائندہ ڈپٹی لیفٹیننٹ آف ویسٹ یارکشائر صوفیہ بنسی، معروف قانون دان سارہ خان بشیر ایم بی ای، لاء سوسائٹی آف انگلینڈ اینڈ ویلز کی نائب صدر لبنیٰ شجاع اور بیرسٹر ماریہ حماد شامل تھیں۔ تقریب کی میزبان ریمی محمد نے مقررین کا تعارف کراتے ہوئے کہا کہ پروفیشنل مسلم خواتین نے برطانیہ میں متعدد رکاوٹوں کو عبور کرکے معاشرے میں اہم مقام حاصل کیا ہے جس پر وہ خراج تحسین کی مستحق ہیں۔ ریمی محمد کا کہنا تھا کہ وکالت و عدالت کے دیگر شعبوں میں خدمات فراہم کرنے والی خواتین نوجوانوں کیلئے رول ماڈل ہیں جن سے متاثر ہو کر مسلم بچیاں زندگی کے مختلف شعبہ جات میں آگے آرہی ہیں۔ کانفرنس کی مہمان خصوصی بیرونس سعیدہ وارثی نے ہائوس آف لارڈز میں اپنی زندگی کے تجربات بیان کرتے ہوئے کہا کہ مسلم خواتین کو اپنے حقوق کے حصول کے لئے بہادری، بے باکی اور خوداعتمادی کے ساتھ آگے آنا ہوگا۔ سعیدہ وارثی کا کہنا تھا کہ مسلم خواتین کو چیلنج قبول کرنے چاہئیں اور اپنے مذہب، رنگ، نسل اور قوم پر فخر کرتے ہوئے اپنے اپنے شعبہ جات میں مملکت برطانیہ کی خدمت کرنی چاہئے۔
