کراچی: کسٹمز نے پورٹ قاسم پر ایل ای ڈی بلب کی آڑ میں ممنوعہ انجکشن کیٹامائن (کیمیکل) امریکا اسمگل کرنے کی کوشش ناکام بنادی۔
تفصیلات کے مطابق میسرز اومٹک انٹرنیشنل کی جانب سے 6 ہزار ڈالر مالیت کے ایل ای ڈی بلب کی ایک کنسائمنٹس امریکا برآمد کرنے کے لیے پورٹ قاسم ایکسپورٹ کلکٹریٹ لائی گئی جس کی کلیئرنس کرنے کی ذمہ داری کلیئرنگ ایجنٹ میسرز کوکب انٹرپرائزز کو دی گئی۔
مذکورہ کنسائمنٹ سے متعلق موصولہ خفیہ اطلاع پر اس کی نگرانی کی گی اور اس کی کسٹمز کلیرنس کو روکنے کے احکامات جاری کیے گئے، کسٹمز حکام کی جانب سے جب اس روکے گئے برآمدی کنسائمنٹ کی باریک بینی کے ساتھ ایگزامینشن کی گئی تو اس بات کا انکشاف ہوا کہ کنسائمنٹ کے 275 کاٹنز میں موجود ایل ای ڈی بلب کے اندر نچلے حصے میں 52.6 کلوگرام کیٹامائن چھپائی گئی ہے۔
کلکٹر کے مطابق کی مالیت 8 کروڑ 18 لاکھ 40 ہزار روپے ہے جبکہ محکمہ کسٹمز میں داخل کردہ دستاویزات میں اس کنسائمنٹ کی برآمدی قیمت 9 لاکھ 30 ہزار روپے ظاہر کی گئی تھی۔
محکمہ کسٹمز نے ملزمان میں شامل میسرز اومٹک انٹرنیشنل کے مالک محمد نعیم انجم، ناصرعباس، شکیل احمد اور چائنیز نیشنل لیین کے خلاف مقدمہ درج کرکے تحقیقات کا آغاز کردیا۔