بینک آف انگلینڈ سربراہ کا تنخواہوں میں اضافے کا مطالبہ نہ کرنے پر زور دینے کے بعد یونینوں کا غصہ
لندن:بینک آف انگلینڈ کے سربراہ کی جانب سے قیمتوں کو کنٹرول سے باہر ہونے سے روکنے کے لئے کارکنوں سے بڑی تنخواہوں میں اضافے کا مطالبہ نہ کر نے پر زور دینے کے بعدیونینوں نے انتہائی غصے سے ردعمل کا اظہار کیا ہے۔ اینڈریو بیلی نے میڈیا سے گفتگو کرتے ہوئے کہا تھا کہ تنخواہوں میں اضافے کو اعتدال پر رکھنے کی ضرورت ہے کیونکہ فرمس نے تنخواہوں پر مذاکرات میں’’تحمل‘‘ کا مظاہرہ کیا ہے۔ جب ان سے پوچھا گیا کہ کیا بینک نے کارکنوں سے تنخواہوں میں بڑے اضافے کا مطالبہ نہ کرنے کو کہا ہے تو مسٹر بیلی نے کہا کہ ’’ ہاں‘‘۔ ڈاؤننگ سٹریٹ اور ٹریژری نے خود کو مسٹر بیلی کے تبصروں سے دور رکھا۔
جی بی ایم یونین نے تبصروں کو ’’بیمار مذاق‘‘ قرار دےدیا جبکہ ٹی یو سی نے کہا ہےکہ تنخواہوں پر پابندی کے مطالبات ’’بے بنیاد‘‘ ہیں۔ محنت کرنے والے لوگوں کو، جنہوں نے اس ملک کو وبا کے دوران مشکلات سے نکالا، انہیں یہ کہنا اشتعال انگیز ہے کہ وہ تنخواہ میں اضافے کے مستحق نہیں ہیں۔ جنرل سیکرٹری جی بی ایم گیری اسمتھ نے کہا کہ یہ ایک بیمار مذاق ہے۔ ٹی یو سی کی اقتصادیات کی سربراہ کیٹ بیل نے کہا کہ تنخواہ میں سست شرح سے اضافہ خاندانی بجٹ پر دباؤ کو مزید سخت کر دے گا۔ انہوں نے مزید کہا کہ توانائی کی قیمتیں مہنگائی کو بڑھا رہی ہیں۔
برطانیہ کو تنخواہوں میں اضافے کی ضرورت ہے، تنخواہ اور معیار زندگی میں کمی کی ایک اور دہائی نہیں چاہئے۔ یونائیٹ کی قائد شیرون گراہم نے کہا کہ کارکنوں کو مسٹر بیلی سے تنخواہوں پر پابندی کے’’لیکچر‘‘ کی ضرورت نہیں ہے۔ انہوں نے کہا کہ آئیے واضح کر دیں کہ تنخواہ پر پابندی قومی تنخواہ میں کٹوتی کے مطالبے کے علاوہ کچھ نہیں ہے۔ جب مسٹر بیلی کے تبصروں کے بارے میں پوچھا گیا تو وزیراعظم کے سرکاری ترجمان نے کہا: "ٹھیک ہے، یہ وہ چیز نہیں ہے جس کے لئے وزیراعظم کہہ رہے ہیں، ہم واضح طور پر ایک اعلیٰ ٰترقی کی معیشت چاہتے ہیں اور ہم چاہتے ہیں کہ لوگوں کی اجرت میں اضافہ ہو۔
چانسلر رشی سوناک نے جمعرات کو کہا کہ نجی شعبے کی اجرت طے کرنا ان کا کام نہیں ہے اور زیادہ اجرت حاصل کرنے کا صحیح طریقہ زیادہ پیداوار ہے۔ جس شرح سے قیمتیں بڑھ رہی ہیں، اس کا مطلب ہے کہ اس سال 7 فیصد سے زیادہ اضافہ ہوگا اور 2022 میں اوسطاً اضافہ 6 فیصد کے قریب ہوگا۔ اس کا مطلب ہے کہ قیمتیں تنخواہ سے زیادہ تیزی سے بڑھنے کی توقع ہے، جس سے کئی دہائیوں میں گھریلو مالیات پر سب سے بڑا دباؤ پڑے گا، 1990 کے بعد سے مزدوروں کی آمدنی کو سب سے زیادہ نقصان پہنچے گا۔ مزدوروں کی تنخواہ میں فی الحال اوسطاً صرف 5 فیصد سے کم اضافہ ہو رہا ہے۔
مسٹر بیلی کو یکم مارچ 2020 سے سال میں پنشن سمیت 538 575 پونڈز ادا کئے گئے، جو کل وقتی ملازمین کی 31285 پونڈز کی اوسط سالانہ تنخواہ سے 18 گنا زیادہ ہے۔ انہوں نے کہا کہ اگرچہ کارکنوں کے لئے یہ قبول کرنا تکلیف دہ ہوگا کہ قیمتیں ان کی اجرت سے زیادہ تیزی سے بڑھیں گی۔ انہوں نے مزید کہا کہ زندگی کی لاگت میں اضافے کو روکنے کے لئے اجرت میں کچھ اعتدال کی ضرورت ہے۔ٹریژری نے مسٹر بیلی کی حمایت کی ہے۔ چیف سیکرٹری سائمن کلارک نے کہا کہ یہ اہم ہے کہ تنخواہ پر پابندی کا مشاہدہ کیا جائے۔
برٹش گیس کے مالک سینٹریکا کے سربراہ کرس اوشیا نے بی بی سی سے گفتگو کرتے ہوئے کہا کہ وہ دونوں طرف دیکھ سکتے ہیں، اگر یہ مہنگائی میں ایک عارضی اضافہ ہے اور اس عارضی اضافے کو پورا کرنے کے لئے اجرت میں اضافہ ہوتا ہے، تو ان اجرتوں کو ادا کرنے والے لوگوں کو اس قیمت سے گزرنا پڑتا ہے اور یہیں سے ہم اجرت کی قیمت میں افراط زر کے دائرے میں آجاتے ہیں۔ دریں اثناء ہائی پے سنٹر کے تھنک ٹینک نے کہا کہ مسٹر بیلی کے تبصرے بد نیتی پر ہی مبنی نہیں بلکہ ’’سختی سے مضحکہ خیز‘‘ اور ’’توہین آمیز‘‘ تھے۔