لاہور:مسلم لیگ (ن) نے پرویز الہی کی بحالی سے متعلق لاہور ہائی کورٹ کے فیصلے کو مسترد کرتے ہوئے اسے سپریم کورٹ میں چیلنج کرنے کا فیصلہ کرلیا۔
میڈیا کے مطابق اس بات کا فیصلہ مسلم لیگ (ن) کے صدر اور وزیراعظم شہباز شریف کی زیر صدارت اجلاس میں کیا گیا جس میں پارٹی کی اعلیٰ قیادت موجود تھی جن میں وزیر داخلہ رانا ثنا اللہ، وزیر قانون اعظم نذیر تارڑ، وزیر اعظم کے معاونین خصوصی ملک احمد خان اور عطا اللہ تارڑ، ق لیگ شجاعت گروپ کے رہنما اور وزیر طارق بشیر چیمہ شریک ہوئے۔
اجلاس میں ملک بھر کی مجموعی صورت حال خصوصاً پنجاب کی موجودہ سیاسی صورتحال پر تفصیلی تبادلہ خیال کیا گیا۔ ذرائع کے مطابق اہم اجلاس میں چودھری پرویز الٰہی کی لاہور ہائیکورٹ سے بطور وزیراعلیٰ بحالی اور اس کے بعد کی صورت حال پر غور کیا گیا۔
اجلاس میں وزیراعلیٰ پنجاب کو گورنر کی جانب سے اعتماد کا ووٹ لینے کے آئینی حکم نامے پر بھی غور کیا گیا۔ پارٹی ذرائع کے مطابق وزیراعظم کو بریفنگ میں بتایا گیا کہ وزیراعلیٰ خواہ اس معاملے کو جتنا بھی تاخیر کا شکار کر لیں، انہیں ہرصورت اعتماد کا ووٹ لینا ہی ہو گا جب کہ وزیراعلیٰ پنجاب کے پاس اعتماد کا ووٹ لینے کے لیے نمبرز بھی پورے نہیں ہیں۔
اجلاس میں شرکا نے چوہدری پرویز الہی کی بطور وزیراعلیٰ پنجاب بحالی کا لاہور ہائی کورٹ کا فیصلہ مسترد کردیا اور متفقہ طور پر طے کیا گیا کہ اس فیصلے کے خلاف قانونی اقدامات کیے جائیں گے اور اسے سپریم کورٹ میں چیلنج کیا جائے گا۔
Comments are closed.