لندن:لندن میں سابق وزیراعظم نواز شریف کے صاحبزادے حسن نواز کے دفتر میں نامعلوم افراد نے داخل ہونے کی کوشش کی ہے۔ لندن پولیس نے معاملے کی تحقیقات شروع کردی ہیں۔
سینٹرل لندن میں ماربل آرچ کے علاقے میں واقع حسن نواز کے دفتر میں نواز شریف، اسحاق ڈار اور عابد شیر علی بھی موجود تھے۔اس دوران دفتر میں نامعلوم افراد نے داخل ہونے کی کوشش کی ہے، حسن نواز کے دفتر پر آنے والے افراد نے نواز شریف کے گارڈز سے بحث بھی کی۔
نواز شریف کے گارڈز نے پولیس بلائی تو چاروں افراد چلے گئے۔ لندن پولیس نے معاملے کی تحقیقات کا آغاز کردیا۔
واقعے پر ردعمل دیتے ہوئے مریم نواز نے کہا کہ آج پھر نواز شریف پر حملہ آور ہونے کی کوشش کی گئی۔اُن کا کہنا تھا کہ ن لیگ کے قائد کا مقابلہ اس سوچ سے ہے، جس نے میری بیمار والدہ کی تصویریں بنانے کی کوشش کی۔ن لیگی نائب صدر نے مزید کہا کہ نواز شریف کی زندگی کے ساتھ دوران حراست کھلواڑ کرنے والے اب تک باز نہیں آئے۔
مسلم لیگ (ن) کے صدر اور اپوزیشن لیڈر شہباز شریف نے بھی واقعے کی مذمت کی ہے۔ایک بیان میں شہباز شریف نے اسے سوچے سمجھے منصوبے کے تحت کیا گیا حملہ قرار دیا۔انہوں نے کہا کہ لندن میں حسن نواز کے دفتر میں زبردستی غنڈوں کا گھس آنا قابل مذمت اور تشویشناک ہے۔