اسلام آباد:وزیراعظم عمران خان کا کہنا ہے کہ بھارت جب تک کشمیر کی خصوصی حیثیت بحال نہیں کرتا، اس کے ساتھ حالات بہتر نہیں ہوسکتے۔انہوں نے کہا کہ نئی دہلی سے تعلقات بہتر ہوجائیں تو پاکستان ایسی جگہ پر واقع ہے جہاں سے خطے کے درمیان تجارتی روابط کو فروغ دینے میں اہم کردار ادا کرسکتا ہے۔
وزیراعظم عمران خان نے تاجکستان کے صدر امام علی رحمان کے ساتھ مشترکہ پریس کانفرنس میں کہا کہ افغانستان کے مسئلے کا پرامن حل خطے کے لیے ضروری ہے، پاکستان اور تاجکستان چاہتے ہیں، غیرملکی افواج کے انخلا کے بعد افغانستان دوبارہ بے امنی کی نظر نہ ہوجائے۔انہوں نے کہا کہ تاجکستان کے صدر امام علی رحمان کو پاکستان آنے پر خوش آمدید کہتا ہوں، تجارت کے شعبے میں دونوں ملکوں کے درمیان روابط مضبوط ہوں گے، دونوں ملکوں کے درمیان تجارت بہت اہمیت رکھتی ہے۔
عمران خان نے کہا کہ تاجکستان کے ساتھ تعلیم اور دفاع کے شعبے میں بھی معاہدے کیے ہیں، تاجکستان اور پاکستان کو کئی مشترکہ چیلنجز کا سامنا ہے، افغانستان میں سیاسی عدم استحکام سے پاکستان اور تاجکستان متاثر ہوتے ہیں۔وزیراعظم نے کہا کہ پاکستان اور تاجکستان کے لیے پرامن افغانستان ضروری ہے ، تاجکستان اور پاکستان کو موسمیاتی چیلنجز کا بھی سامنا ہے، بھارت کشمیر سے متعلق 5 اگست کے اقدامات جب تک واپس نہیں لیتا حالات بہتر نہیں ہوسکتے۔
تاجک صدر امام علی رحمان نے کہا کہ پاکستان آمد پر پرتپاک استقبال پر شکر گزار ہوں،تاجکستان، پاکستان کے ساتھ برادرانہ تعلقات کو قدر کی نگاہ سے دیکھتا ہوں، خطے میں امن و امان سے متعلق پاکستان کی کوششوں کو سراہتے ہیں۔انہوں نے کہا کہ پاکستان کے ساتھ ٹیکنالوجی، تعلیم اور دفاع کے شعبوں میں تعاون جاری رکھیں گے۔