باغ:وزیراعظم عمران خان نے کہا ہے کہ طاقت ور کو ہمارا انصاف کا نظام نہیں پکڑ سکتا،پاکستان اور کشمیر کا رشتہ لا الہ الاللہ کا ہے اور ہم چاہتے ہیں کہ مقبوضہ کشمیر بھی آزاد ہو،جوپاکستان بننے جارہا ہے ہم غریب ملکوں کوامداد دیا کریں گے،ہم بھی فلاحی ریاست کی کوشش کر رہے ہیں،ہم نےخیبر پختونخوا میں تمام شہریوں کوہیلتھ کارڈ دیئے، سال کے آخرتک تمام کشمیریوں کوہیلتھ انشورنس دیں گے۔
آزاد کشمیرکے ضلع باغ میں سردار تنویر الیاس خان کی انتخابی مہم کےجلسے سے خطاب کرتے ہوئے وزیراعظم نےکہاکہ غریب خاندان علاج کرانے کے لیے ہرچیزبیچ دیتا ہے، ہیلتھ کارڈ سے کسی بھی ہسپتال سے مفت علاج کرایا جاسکتا ہے، ہم بھی فلاحی ریاست کی کوشش کر رہے ہیں، ہم نے خیبرپختونخوا میں تمام شہریوں کوہیلتھ کارڈ دیئے، سال کے آخرتک تمام کشمیریوں کوہیلتھ انشورنس دیں گے۔
انہوں نے کہا کہ طاقت ورکوقانون کے نیچے لانے کی کوشش کررہے ہیں، ہم اپنے ملک کے مستقبل کی جنگ لڑرہے ہیں، بدقسمتی سے کبھی اپنے پاؤں پرکھڑا ہونے کی کوشش نہیں کی، قرضے لیکرگزارہ کرتے ہیں، کوئی بھی ملک ہاتھ پھیلا کرعظیم قوم نہیں بن سکتی، جوپاکستان بننے جارہا ہے ہم غریب ملکوں کوامداد دیا کریں گے۔
وزیراعظم نے کہاکہ کیا کسی نے برطانیہ میں دیکھا طاقت ورڈاکوپکڑا جائے اورجرات ہے این آراومانگے؟ کسی خوشحال ملک میں این آر او مانگنے کی جرات نہیں ہوتی، جیلوں میں صرف غریب لوگ ہیں، طاقت ور کو ہمارا انصاف کا نظام نہیں پکڑ سکتا، کبھی ایسا نہیں ہوتا جھوٹے ٹیسٹ دکھا کرایکٹنگ کرکے ملزم برطانیہ میں چلا جائے، جس ملک میں قانون سب کے لیے برابروہ خوشحال ہے۔
عمران خان کا کہنا تھا کہ جن قوموں میں انصاف نہ ہووہ تباہ ہوجاتی ہیں، کفرکا نظام چل سکتا ہے ظلم کا نہیں، جب قوم میں انصاف نہ ہوتوقوم کبھی ترقی نہیں کر سکتی، بڑے،بڑے ڈاکوصرف این آراومانگ رہے ہیں، یہ چاہتے ہیں ان کے گناہ معاف کردوں،مدینہ کی ریاست کا ماڈل تحریک انصاف اپنارہی ہے، پناہ گاہوں میں مزدورطبقے کومفت کھانا دیا جاتا ہے، مدینہ کی ریاست میں سب سے پہلے انسانیت تھی، چین نے مدینہ کا ماڈل اپنا کر ستر کروڑ لوگوں کو غربت سے نکالا، انصاف کے نظام کے بغیرکوئی قوم اوپرنہیں جاسکتی۔
وزیر اعظم کا کہنا تھا کہ 40فیصد خاندانوں کو بغیر سود کے قرضے دیئے جائیں گے ، جس سے یہ خاندان اپنا کاروبار شروع کرسکیں گے اور خواتین کو ٹیکنیکل ایجوکیشن دی جائے گی جس کے بعد وہ گھر بیٹھیں پیسے بناسکتی ہیں ۔وزیراعظم نے مقبوضہ کشمیر کے لوگوں کو پیغام دیتے ہوئے کہا کہ پوری دنیا کشمیریوں کی قربانیوں کی معترف ہے، ہم آپ پر فخر کرتے ہیں،مودی نے 5اگست کو مقبوضہ وادی کے لوگوں پر مزید ظلم شروع کیا، دنیا سمجھ رہی تھی کہ مقبوضہ وادی کے لوگ گھٹنے ٹیک دیں گے مگر انکا جذبہ ایمانی تھا۔
وزیراعظم نے ایک مرتبہ پھر پوری دنیا میں کشمیریوں کا سفیر بننے کا اعلان کرتے ہوئے کہا کہ پوری دنیا میں کشمیر کا سفیر بن کر نکلوں گا اور آپ کی بات کروں گا۔ان کا کہنا تھا کہ بھارت میں تمام اقلیت کے آر ایس ایس کے نظریے سے خطرہ ہے، سب سے زیادہ خطرہ خود بھارت کو ہے۔عمران خان نے اپوزیشن جماعتوں کو ہدف تنقید بناتے ہوئے کہا کہ جب پیسہ اور کاروبار پاکستان میں نہیں وہ کبھی عوام کیلئے سٹینڈ نہیں لے سکتا اگر میرا بھی کاروبار باہر ہوتا تو میں بھی امریکا کو ایب سلوٹلی ناٹ نہیں کہہ پاتا۔