لوٹن: جموں کشمیر لبریشن فرنٹ برطانیہ زون کے الیکشن کمیشن کا ایک اہم اجلاس 30 جولائی2021 بروز جمعہ منعقد ہوا جس میں نو منتخب ممبر کمیشن سینئر فرنٹ رہنما ملک مشتاق (لندن سلا ئو) کو اتفاق رائے سے نیا الیکشن کمشنر منتخب کیا گیا جبکہ لوٹن سے اعجاز ملک بدستور سیکرٹری الیکشن کمیشن کے فرائض سرانجام دیں گے۔
بعد ازاں نئے منتخب الیکشن کمشنر ملک مشتاق کی صدارت میں منعقدہ اجلاس میں سیکرٹری الیکشن کمیشن اعجاز ملک کو کنونشن کے لئے ایک ضابطہ اخلاق تیار کرنے اور ممبران الیکشن کمیشن کے لئے الگ ضابطہ اخلاق ترتیب دینے کی ذمہ داری دی گئی۔
جموں کشمیر لبریشن فرنٹ برطانیہ زون کی عبوری کنوینیر کمیٹی کے گزشتہ اجلاس میں کئے گئے فیصلوں کے مطابق جموں کشمیر لبریشن فرنٹ برطانیہ زون کی تنظیم نو 15 ستمبر 2021 کو مکمل کیا جانا قرار پائی ہے اس فیصلے کی روشنی میں الیکشن کمیشن نے یہ واضع کیا کہ 15ستمبر 2021 رات 12بجے تنظیم نو مکمل ہونے کے بعد کوئی نئی برانچ قائم ہو گی اور نہ ہی کوئی نیا ممبر لیا جائے گا۔
برطانیہ زون کے ممبران کو اپنی اولین فرصت میں ممبر شب تجدید کرنے کی ہدایت کی گئی ہے تاکہ "فری یاسین ملک کنونشن” کا انعقاد دستور اساسی کی حکمرانی کو قائم رکھتے ہوئے مکمل کیا جا سکے سیکرٹری الیکشن کمیشن اعجاز ملک کے مطابق ایگزیکٹو کمیٹی کے لئے انتخابات میں حصہ لینے کے خواہش مند ممبران کیلئے جلد اپلیکیشن فارم شائع کیا جائے گا۔ ستمبر کے آخری ہفتے میں انتخابات میں حصہ لینے والے اُمیدواروں سے درخواستیں وصول کی جائیں گی۔
اگر درخواستوں پر کوئی اعتراض لگا تو الیکشن کمیشن کی دو رکنی کمیٹی تین دن میں ان اعتراضات کو حل کرکے امیدواروں کو واپس کرے گی۔ اجلاس کے شرکاء میں ممبران الیکشن کمیشن طارق شریف لندن، حاجی اقبال بیڈفورڈ، ملک مشتاق سلاو اور سردار مشتاق نوٹینگم شامل تھے۔ خیال رہے کہ قبل ازیں الیکش کمشنر فرنٹ کے فرائض فرنٹ برطانیہ کے سابق صدر حاجی راجہ راوف انجام دے رہے تھے مگر کچھ عرصہ قبل ان کی رحلت ہو گئی ہے۔