لندن:برطانیہ میں شدید طوفان بادوباراں کے باعث سیکڑوں سکول بند جبکہ کئی ٹرینوں کی آمدورفت اورپروازیں منسو خ کردی گئیں۔ اطلاعات کے مطابق درخت گرنے سے ایک شہری بھی ہلاک ہوگیا۔لندن، جنوب مشرقی اور مشرقی انگلینڈ کے کچھ حصوں کے لیے تیز ہوا کے ریڈ وارننگ جاری کی گئی،شمالی آئرلینڈ اور سکاٹ لینڈ کے لیے بھی انتباہ جاری کردیا گیا۔ آئل آف وائٹ میں 122 میل فی گھنٹہ کی رفتار سے چلنے والی ہوائوں نے رفتار کی شدت کا نیا ریکارڈ قائم کردیا، اس سے قبل1978میں کارنوال میں118 میل فی گھنٹہ کی رفتار کا ریکارڈ تھا۔
درخت گرنے کے سبب متعدد علاقوں میں سڑکوں کو بھی بند کرناا پڑا۔ ویلز میں ٹرین سروس کو مکمل طور پر بند کردیا گیا تھا۔ ویلز میں ایم 4 پر تیز ہوائوں سے لاری الٹنے سے کئی گھنٹوں تک ٹریفک متاثر رہا۔لوٹن اور ڈنسٹیبل میں عمارتیں متاثر ہونے،جانی ودیگر نقصان پہنچنے کاخدشہ ہے، عوام کو غیرضروری طور پر گھروں سے نہ نکلنے کی ہدایت کردی گئی۔ تفصیلات کے مطابق طوفان باد و باراں ، آندھی اور تیز سرد ہواوں کے جھکڑوں نے برطانیہ کو اپنی شدید لپیٹ میں لے لیا ہے متاثرہ علاقوں میں لوٹن بھی شامل ہے۔ طوفان کے بارے میں پیش گوئی کرنے والوں نے خبردار کیا ہے کہ یہ تین دہائیوں میں برطانیہ کے بدترین طوفانوں میں سے ایک ہو سکتا ہے۔ آئل آف وائٹ پر نیڈلز پر 122 میل فی گھنٹہ کی رفتار سے چلنے والا ہوا کا جھونکا عارضی طور پر انگلینڈ میں ریکارڈ کیا گیا جو سب سے زیادہ جھونکا ہے۔
شہریوں پر زور دیا جا رہا ہے کہ اگر ہو سکے تو سفر کرنے سے گریز کریں اور جب ہوائیں تیز رفتاری تک پہنچ جائیں تو گھر پر ہی رہیں۔ لندن میں O2 ایرینا کی چھت کے کچھ حصے ٹکڑے ٹکڑے ہو گئے ۔ پہلی بار میٹ آفس نے لندن، جنوب مشرقی اور مشرقی انگلینڈ کے کچھ حصوں کے لیے ہوا کے لیے ریڈ وارننگ جاری کی ہے جو بلند ترین سطح کی وارننگ ہے۔ شمالی آئرلینڈ اور سکاٹ لینڈ میں برف اور ہوا کے لیے پیلے رنگ کے انتباہات ہیں ۔خراب موسم کے باعث سیکڑوں سکول بند ہیں اور کئی ٹرینیں اور پروازیں منسوخ کر دی گئی ہیں۔میٹ آفس کی جانب سے جو ریڈ ویدر وارننگ جاری کی گئی ہے، اس میں لوٹن اور ڈنسٹیبل اس علاقے کے نیچے آ رہے ہیں جہاں طوفان کے سب سے زیادہ ٹکرانے کی توقع ہے۔
لوٹن اور ڈنسٹیبل کے رہائشیوں کو محتاط رہنے کی ہدایت کردی گئی۔ اس آندھی اور طوفان کے نتیجے میں اٹھنے والے ملبے سے انسانی جانوں کو خطرہ لاحق ہو سکتا ہے۔ جبکہ بعض عمارتوں اور گھروں کو نقصان پہنچنے کا خدشہ ہے، چھتیں اڑ سکتی ہیں اور بجلی کی تاریں گر سکتی ہیں ۔ ایسے طوفان سے سڑکیں، پل اور ریلوے لائنیں بند ہو جاتی ہیں، بس، ٹرین، فیری سروسز اور پروازوں میں تاخیر اور منسوخی ہوسکتی ہے ۔ بجلی اور موبائل فون کی سروس بھی متاثر ہونے کاخدشہ ہے۔ ڈوور اور کیلے کے درمیان فیری سروس بھی معطل کردی گئی تھی۔ ایک لاکھ 10 ہزار سے زائد گھر بجلی سے محروم ہوگئے۔ مشرقی لندن میں تیز ہوائیں اوٹو ارینا کی چھت کا ایک حصہ اڑا کر لے گئیں۔ تاریخ میں پہلی مرتبہ ایم 4 پر پرنس آف ویلز برج اور ایم 48 پر سبورن برج کو بند کردیا گیا جبکہ کینٹ میں ڈارٹفورڈ برج اور ٹنل کو بھی بند کردیا گیا تھا، کارنوال، گلوسٹر شائر، ایون اینڈ سمرسیٹ اینڈ ہمشئر میں ایمرجنسی ڈکلیئر کردی گئی۔ وزیراعظم بورس جانس نے اپنے سوشل میڈیا پیغام میں کہا کہ ہم سب کو احتیاطی تدابیر پر عمل کرتے ہوئے محفوظ رہنا چاہئے۔
انہوں نے ایمرجنسی سروسز کا شکریہ بھی ادا کیا۔ کسی بھی ایمرجنسی سے نمٹنے کیلئے حکومت نے فوج کو تیار کر رکھا تھا جبکہ جمعہ کو اس حوالے سے کوبرا اجلاس بھی ہوا۔ ادھر مانچسٹر سے نمائندے کے مطابق طوفان صبح 10 بجے سے شام 4 بجے تک شہر کو متاثر کرے گا۔ اسسٹنٹ چیف کانسٹیبل وسیم چوہدری، گریٹر مانچسٹر ریزیلینس فورم کے سربراہ نے کہا کہ طوفان ہمیں ان ہواؤں سے متاثر دیکھے گا جو اندرون ملک کے لیے غیر معمولی طور پر اونچی ہوتی ہیں اور اس سے کچھ مسائل پیدا ہونے کا خدشہ ہے۔ سب سے خاص بات یہ ہے کہ ہم گرتے ہوئے درختوں یا ملبے، زیر تعمیر چھتوں یا ڈھانچے کو پہنچنے والے نقصان اور ڈرائیونگ یا سفر کرنے میں بہت مشکل کی توقع کر سکتے ہیں۔ بجلی کی کٹوتی کا خطرہ بھی ہے۔ انہوں نے کہا کہ مجھے یقین ہے کہ ہم سب مل کر اچھی طرح سے اپنے اپ کو محفوظ رکھنے کے لیے تیار ہیں، ہمارے پاس ایسے لوگ اور وسائل موجود ہیں جن کی ہمیں ضرورت ہو سکتی ہے اور ضرورت پڑنے پر واقعات کا جواب دینے کے لیے ایک مضبوط منصوبہ ہے۔