لندن:وزیر خارجہ مخدوم شاہ محمود قریشی نے 26 ستمبر 2021 کو پاکستان ہاؤس لندن میں کشمیر سے تعلق رکھنے والے نامور برطانوی پاکستانی رہنماؤں اور کمیونٹی کے نمائندوں سے ملاقات کی۔
ملاقات کے دوران وزیر خارجہ نے مقبوضہ جموں و کشمیر میں بھارتی انسانی حقوق کی خلاف ورزیوں کو اجاگر کرنے میں پاکستانی کشمیری برادری کے مثبت کردار کی تعریف کی اور انہیں حکومت پاکستان کی جانب سے کشمیر کاز کو آگے بڑھانے کیلئے کیے گئےاقدامات سے آگاہ کیا ۔وزیر خارجہ نے کہا کہ اس سلسلے میں حکومت پاکستان نے معتبر بین الاقوامی ذرائع پر انحصار کرتے ہوئے حال ہی میں ایک ڈوزیئر مرتب کیا اور اقوام متحدہ میں پیش کیا جس میں بھارتی قابض افواج کے 3 ہزار سے زائد جنگی جرائم کی تفصیل بیان کی گئی تھی۔
وزیر خارجہ قریشی نے برطانوی پارلیمنٹ میں مقبوضہ کشمیر پر حالیہ مباحثے کی تعریف کی ۔ انہوں نے کہا کہ برطانوی پارلیمنٹ میں مقبوضہ کشمیر پر حالیہ مباحثے میں ایک بار پھر بھارتی قابض فوج کے مظالم اور انسانی حقوق کی خلاف ورزیوں کا پردہ چاک کیا گیا ۔ انہوں نے برطانوی پاکستانی کمیونٹی کی حوصلہ افزائی کی کہ وہ مقبوضہ کشمیر میں جاری انسانی حقوق کی خلاف ورزیوں کو منظر عام پر لانے میں اپنا کردار ادا کریں۔ وزیر خارجہ نے کشمیری قیادت کو یقین دلایا کہ پاکستان کشمیریوں کی اقوام متحدہ کی سلامتی کونسل کی قراردادوں کے مطابق حق خودارادیت کے حصول تک ان کی مکمل سیاسی ، اخلاقی اور سفارتی حمایت جاری رکھے گارکھے گا۔