وزیر خارجہ شاہ محمود قریشی سےبرطانوی پارلیمنٹ کے ہاؤس آف کامنز فارن آفیرز اور ڈیفنس کمیٹیوں کے سربراہان کی ملاقات

لندن: پاکستان ہائی کمیشن لندن میںوزیر خارجہ مخدوم شاہ محمود قریشی سے ہاؤس آف کامنز سلیکٹ کمیٹی برائے خارجہ امور کے سربراہ ٹام ٹگن ڈاٹ اور ڈیفنس کمیٹی کے سربراہ ٹوبیاس ایلووڈ کی سربراہی میں برطانوی پارلیمنٹیرینز کے وفد نے ملاقات کی۔

وزیر خارجہ نے برطانوی پارلیمانی وفد کا خیر مقدم کیا ،وزیر خارجہ نے برطانوی پارلیمنٹیرینز کو افغانستان کی ابھرتی ہوئی صورتحال کے بارے میں پاکستان کے نقطہ نظر سے آگاہ کیا، شاہ محمود قریشی نے کہا کہ افغانستان کے حوالے سے پاکستان اور برطانیہ کی سوچ میں ہم آہنگی ہے، دونوں ممالک افغانستان میں قیام امن چاہتے ہیں،ضرورت اس امر کی ہے کہ افغانستان کو تنہا نہ چھوڑا جائے۔

وزیر خارجہ کا مزید کہنا تھا کہ عالمی برادری، افغانوں کو انسانی بحران سے بچانے کیلئے آگے بڑھے، افغانستان میں عدم استحکام سے افغان مہاجرین کی یلغار سمیت کئ مسائل سر اٹھائیں گے، ہمیں آج حقیقت پسندانہ سوچ کا مظاہرہ کرنا ہو گا۔

وزیر خارجہ نے برطانوی پارلیمنٹیرینز کو بھارتی قابض افواج کی جانب سے مقبوضہ جموں و کشمیر میں جاری مظالم،بدترین محاصرے اور انسانی حقوق کی سنگین خلاف ورزیوں سے آگاہ کیا۔

شاہ محمود قریشی نے کہا کہ ہم نے بھارتی قابض افواج کے مقبوضہ جموں و کشمیر میں جاری مظالم پر 131 صفحات پر مشتمل "ڈوزئیر”جاری کیا ہے جس میں بھارتی افسران کے جنگی جرائم میں ملوث ہونے کے ناقابل تردید ثبوت موجود ہیں، ہم نے ٹھوس شواہد دنیا کے سامنے رکھ دیے ہیں تاکہ وہ خود ان حقائق کو جانچ سکیں۔

پاک برطانیہ تعلقات پر روشنی ڈالتے ہوئے وزیر خارجہ نے کہا کہ پاکستان اور برطانیہ قریبی دوست اور دیرینہ شراکت دار ہیں اور اب وقت آگیا ہے کہ پاک برطانیہ اسٹریٹیجک شراکت داری کو آگے بڑھایا جائے اور تعلقات کو اگلے درجے تک لے جایا جائے۔ اگلے سال پاکستان اور برطانیہ کے درمیان سفارتی تعلقات کے 75 سالہ جشن کو شاندار طریقے سے منانے کا ارادہ رکھتے ہیں۔

وزیر خارجہ نے پاکستان اور برطانیہ کے درمیان باہمی تعلقات کو مزید مستحکم اور فعال بنانے اور اقتصادی تعلقات کو وسعت دینے کیلئے برطانیہ میں مقیم 16 لاکھ پاکستانی نژاد برطانوی شہریوں کی خدمات کو بہتر طور پر بروئے کار لانے کی ضرورت پر زور دیا۔